ဘာမှန်းမသိလိုက်ရတဲ့..သင်္ကြန်

သင်္ကြန်အတက်နေ့…

ဒီနှစ်သင်္ကြန်ကတော့ ကိုယ်နဲ့မဆိုင်သလို ခပ်တည်တည်ပင်..

သူကလည်းဖာသိဖာသာ..ကိုယ်ကလည်းဖာသိဖာသာ..

လူသူကင်းဝေးရာကျွန်းလေးတစ်ကျွန်းပေါ်.. ပျင်းရိငြီးငွေ့စွာ သင်္ကြန်ရက်များကိုဖြတ်ကျော်ခဲ့ရပါတယ် ။

ကမ်းရိုးတန်း ဂေဟစနစ် ပြန်လည်ထိမ်းသိမ်းရေး စိုက်ခင်းများ မြေပုံဆွဲရင်း..

မြေပြင်အကွက်ရိုက်ရင်း..သင်္ကြန်ရေလည်းမအေးနိုင်..ပိတောက်လည်းမမွှေးနိုင်..။

ငယ်စဉ်တောင်ကျေး ကလေးဘ၀ကတော့..သင်္ကြန်နားနီး တစ်ပတ်လောက်ကပင်

ရေပြွတ်တပြင်ပြင် ခင်မင်ရာတွေ အဖေါ်စုလို့..ရင်တဖိုဖို..။

ငါးတန်းကျောင်းသားဘ၀ သင်္ကြန်ရက်မှာ ရှင်ပြုပေးတော့ ရေမကစားရလို့ ငိုရသေးတယ်..

ဘာနဲ့တူလည်းဆိုတော့..ရွာမှာ ပွဲရှိတဲ့ည..ကရောင်းနှက်သံတွေကြားတော့.ပွဲကကြည့်ချင်

အိမ်ကမလွှတ်..အိပ်ယာထဲမှာ..ကြီတ်ငိုရတာမျိုးပေါ့..။

သင်္ကြန်ဆိုတာကလည်း ခက်သားလား..ပျော်စရာဆိုပေမဲ့အသက်ရွယ်နဲ့ကလည်းဆိုင်တာပါ..။

လူပျိုပေါက်လေးဖြစ် ပိုးတတ်ပန်းတတ်လာတော့..ကိုယ်ကြိုက်တဲ့ကောင်မလေးဘယ်ချိန်အပြင်ထွက်ပါ့..

လမ်းထိပ်က ရစ်သီရစ်သီလုပ်ရတာကိုက..အရသာ..ရင်ခုန်တမ်းမက်စရာ..။

ညိုပြာညက်လေးကို..အကျနေ့..ဒါမှမဟုတ် အတက်နေ့ ..

ဘယ်နေ့ပဲဖြစ်ဖြစ်..ဒါကအကြောင်းမဟုတ်..

ဦးဦးဖျားဖျား..သူများထက်အရင် ရေလောင်းဖြစ်ဖို့သာ အဓိက..။

မှတ်မိသေးတယ်..မေတ္တာရေကြည်လေးတစ်ဖလားကို..နုတ်ခမ်းဆူ..ခြေဆောင့်သွားခဲ့တာ..

နောက်တော့လည်း သူများနောက်ပါသွားခဲ့တာပါပဲလေ..။

ခုဆိုသူ့သားအကြီးကောင်လေးတောင် ကျောင်းတက်နေပီတဲ့လေ..။

ဟိုတစ်နှစ်ကသင်္ကြန် ရွာပြန်တော့..ညိုပြာညက်လေးကို တွေ့ပါသေးတယ်..

 ညိုပြာညက်ဘ၀ကနေ..ပုတ်ကြီးတစ်လုံးလိမ့်လာသလို..အဆီတုံးကြီးဖြစ်လို့ပါဗျာ

ဒါတောင်လုပ်ချသွားသေး. “ ဟဲ့..အောင်ထက် ငါ့ကိုရေပက်မလို့ ချောင်းနေတာလား..”  တဲ့..

ကိုယ်ကတော့..မချိသွားဖြဲလေးပဲလုပ်နေလိုက်ရပါတယ်..။

ကျွန်တော်ဆိုတဲ့ကောင်က..ခြေထောက်ဗွေပါလေလားမသိ..

ကျောင်းပြီးထဲကိုက..တစ်နယ်ပြီးတစ်နယ်သာပြောင်းနေရ..

တစ်ခါတလေတော့..သင်္ကြန်တွင်းမှာတောင်..ရေကစားရမှန်းမသိတဲ့နေရာမျိုး..

ပိုးကရှိနေတာ့..အချောအလှလေးတွေမြင်..ရေပက်ချင်လို့လည်းမပက်ရ..

အတော်ခွကျတဲ့နေရာလဲကြုံဘူးရဲ့။

ရန်ကုန်သင်္ကြန်တော့..မှတ်မှတ်ရရ..တစ်နှစ်ပါပဲ..

နေကပူပူ..သွေးကဆူဆူ..ယမကာလေးကကူ.. အဲဒီနှစ် ကလို့ကောင်းလိုက်တာ....

စင်ပေါ်နဲ့..စင်အောက် သူနိုင်ကိုယ်နိုင်..အပြိုင်ကြဲလိုက်ကြတာ..

သင်္ကြန်လည်းပြီးရော..မျက်စိ နား နခေါင်း..လည်ချောင်းဆေးရုံပြေးရပါလေရော..

နာရီတစ်လုံးကျပျောက်တာလည်းအဖတ်တင်သေး..။

ခုချိန်ထိ..အသက်လေးရတာတောင်..သင်္ကြန်ကျပြီဟေ့ဆိုရင်..ရန်ကုန်သင်္ကြန်ကိုတမ်းတတုန်း..

တစ်ပွဲတစ်လမ်း အကဲစမ်းချင်ပါသေးရဲ့..။

ဒီနှစ်ကတော့ အခြေနေအရ..ယားလို့တောင်မကုတ်အားတဲ့ဘ၀..

ပင်လယ်ပြင်က ကျွန်းလေးတစ်ကျွန်းပေါ်ရောက်နေမှတော့..

အင်တာနက်ထဲလဲ ရေမပက်နိုင်..

Face Book ထဲမှာလဲ..သူလေးကို ပိတောက်ခက်လေး မပေးနိုင်..

မသကာ gtalk မှာ “ ဟိုင်း..နှစ်သစ်မှာ..ပျော်ရွှင်နိုင်ပါစေ..နော်..”  တော့လုပ်ချင်ပါသေးရဲ့..။

တွေးရင်းတောရင်းနဲ့..အနောက်အရပ်ဆီမှာ..

ဆည်းဆာက ပင်လယ်ကြီးကို ပွေ့ဖက်နေခြေပြီ..မကြာမီမိုးချုပ်တော့မည်..

ပင်လယ်ပြင်ရဲ့လှိုင်းအိလေးများက..ငြင်သာစွာ ပြေးတက် ပြေးဆင်း..

မင်းတို့ခြေရာတွေ မထားခဲ့ကြပါနဲ့..

ဘာရယ်ညာရယ်တော့မဟုတ်..

သင်္ကြန်နဲ့အတူ ကျွန်တော့်ကောင်မလေးကို လွမ်းလို့ပါ..။