(ဆယ်တန်းပြီးခါစ ... လွန်ခဲ့တဲ့ သုံးနှစ် .... Social Site တွေကို လေ့လာခါစ တုံးက ရေးထားတဲ့ စာလေး ... ဖုန်တွေ သဲတွေထဲက ပြန်တွေ့တာ ... ပြန်ဖတ်ပြီးတော့ မျက်ရည်တောင်ကျတယ် ... မေမေက အခန်းထဲဝင်လာပြီး လာကြည့်တာ စိတ်ဖောက်ပြန်သွားလို့ အသေအကြေရယ်နေတာလားလို့ တဲ့ ... ဟီးးးးး ..... ကိုယ်ရေးထားတာ ဟုတ်မှ ဟုတ်ရဲ့လားလို့တောင် သံသယ ၀င်မိတယ် ... ကိုယ့်ဘာသာကိုယ် ပြန်ဖတ်တာတောင် သဘောကျမိလို့ .... သူငယ်ချင်းတို့ကိုလည်း ဖတ်စေချင်လို့ ... အားပေးလိုက်ဦးနော်)
ပြောရဦးမယ်သိလား ... တခြားတော့မဟုတ်ပါဘူး။ ငယ်ငယ်ကအကြောင်းပေါ့ဗျာ ..။ ကျွန်တော်ငယ်ငယ်က ကလေးပေါ့ဗျာ... ။ အင်းပေါ့ ငယ်ငယ်ကပါဆိုမှ ကလေးပေါ့နော့်...။ ငယ်ငယ်ကဆိုရင် အရမ်းကမြင်းတာ ... ။ မေမေကဆိုခဏခဏပြောတယ် နင့်ကို မျောက်နက္ခတ်နဲ့ ယှဉ်ပြီးမွေးလာတာနေမှာတဲ့ ..။ အင်းဗျ ဖြစ်နိုင်တယ် ။ တစ်ခါတုံးက ဖေဖေက ကျွန်တော့်အတွက်ဆိုပြီး မျောက်တစ်ကောင်ဝယ်လာပေးဖူးတယ်။ မေမေက ဘာလုပ်တာလဲဆိုတော့ ဒီမျောက်ဆော့တာကို ကျွန်တော်ထိုင်ကြည့်နေပြီးတော့ မျက်စိနောက်သက်သာသွားအောင် ၀ယ်လာတာတဲ့ ...။ မကြာပါဘူး နောက်တစ်နေ့ကျတော့ ဖေဖေမျောက်ကို ဆိုင်ပြန်သွားရောင်းတယ် ..။
ကျွန်တော်ဆော့တာကိုပဲ မျောက်ကထိုင်ကြည့်နေလို့လေ ...းp
အဲ့ ရောင်းတယ်ဝယ်တယ်ဆိုမှ သတိရတယ်..။ ပြောရဦးမယ်သိလား..။ ကျွန်တော်ငယ်ငယ်က ကျွန်တော့်တို့အိမ်နဲ့ မျက်စောင်းထိုးလေးမှာ ကုန်စုံဆိုင်လေးတစ်ခုရှိတယ်။ အဲ့ဒီဆိုင်က အကုန်ရတယ်။ ကုန်ခြောက်ကုန်စို၊ကြက်သွန်၊အားလူး စတာတွေနဲ့ စားသောက်ကုန်၊လူသုံးကုန် အစုံပေါ့ ။ အရမ်းရောင်းရတာပေါ့ဗျာ။ အလေးလည်း အရမ်းမှန်တယ်။ ဘယ်လောက်ထိ မှန်လည်းဆိုတော့၊ မိုးရာသီတစ်ခု မိုးတွေအရမ်းရွာပြီး ရေတွေကြီးတော့ သူတို့ဆိုင်က အနိမ့်ပိုင်းကျတော့ ရေနည်းနည်းမြုပ်တယ်လေ။ ပစ္စည်းတွေလည်း နည်းနည်းတော့ မျောကုန်တာပေ့ါ။ နောက်တစ်နေ့ ရေလည်းကျရော ဆိုင်ကအန်တီကြီးက သူ့ပစ္စည်းတွေနိုင်သလောက်ပြန်စုတော့
ရေနဲ့မျောလာတဲ့ သူ့အလေးတွေက ကျွန်တော်တို့အိမ်ရှေ့ကို ရောက်လို့.. :P
ထားပါတော့လေ .. ကျွန်တော်ပြောချင်တာက တခြားပါ။ တစ်နေ့ကျွန်တော်ကျောင်းသွားတုံး အဲ့ဒီဆိုင်မှာ ဆိုင်းဘုတ်အသစ်တစ်ခု ရေးထားတာကို တွေ့တယ်ဗျ။ တခြားဟာတွေကျွန်တော်သိပ်မဖတ်တတ်သေးဘူးလေ .. ။ အဲ့ဒီဆိုင်းဘုတ်ထဲမှာ ကျွန်တော်ဖတ်တတ်တာက ခြောက်လုံးပဲပါတယ်။ ဒါပေမယ့် ကျွန်တော်ထင်တယ် ..။ အဲ့ဒါပစ္စည်းအသစ်တစ်ခုခုနာမည်ပေါ့ ..။ ကျွန်တော်လည်း တစ်ခါမှမကြားဖူးဘူး။ မေမေတို့ကို မေးမလို့ကလည်း သူတို့ကလည်း သူတို့အလုပ်နဲ့ သူတို့ရှုပ်နေကြတယ်ဆိုတော့ ကိုယ့်ဘာသာကိုပဲ သိအောင်လုပ်မယ်လို့ ဆုံးဖြတ်လိုက်တယ်။ ပြီးတော့ဘာလုပ်တာလဲဆိုတော့ ကျွန်တော့်ရဲ့ရှိစုမဲ့စုမုန့်ဖိုးလေးကို ကိုင်ပြီး အဲ့ဒီဆိုင်ကို သွားတယ်လေ။ ပြီးတော့ ခပ်တည်တည်ပဲ ပြောလိုက်တယ်။
`အန်တီ လက်လီ ၅၀ဖိုးနဲ့ လက်ကား ၅၀ဖိုးလောက် ထည့်ပေးစမ်းပါ ။ ဟို သက်သက်စီ ခွဲထုတ်ပေးနော် ...။´
ဆိုင်ရှင် အဒေါ်ကြီးက ဒေါသထွက်နေတဲ့ မျက်လုံးကြီးနဲ့ ကျွန်တော့်ကိုစိုက်ကြည့်နေတာပေါ့ ..။ အဲ့ဒါနဲ့ ကျွန်တော်ပဲ မှားပြောမိသလားဆိုပြီး အန်တီကြီး ခေါင်းကို ကျော်ပြီး ဆိုင်းဘုတ်ကိုလှမ်းဖတ်ကြည့်လိုက်တော့ ဟုတ်ပါတယ်။
`..... လက်လီ လက်ကား ရပြီ´ လို့ရေးထားတာပါ။
ကျွန်တော်မမှားပါဘူး ..။ မှန်သားပဲဆိုပြီး ပြန်ပြုံးပြလိုက်တော့ အန်တီကြီးက ကျွန်တော့်ကို အလကားနေအလကား လာနောက်ရပါ့မလားဆိုပြီး ကျွန်တော့်ကို ခွေးနဲ့ ရှူးတိုက်လွှတ်တယ် ..။ ပြေးလိုက်ရတာ ပြောမနေနဲ့တော့ ။ ကျွန်တော်ဘာများမှားသွားလည်းဗျာ ..။ အခုထိစဉ်းစားလို့ကို မရဘူး...။
သြော် .. ခွေးဆိုလို့ ပြောရဦးမယ် သိလား ။ ကျွန်တော်ငယ်ငယ်တုံးက ခွေးအရမ်းလိုချင်လို့ မေမေကိုပူဆာတယ်လေ။ မေမေက ခွေးလှလှလေးတစ်ကောင် ၀ယ်ပေးတယ်။ နာမည်ကို ဂျော့ လို့ပေးလိုက်တယ်။ အရမ်းလိမ္မာတာဗျ...။ သူနဲ့မသိတဲ့လူတွေဘာတွေလာရင် ဟောင်တာအမှ အလွန်။ ကိုက်တော့မကိုက်ဘူး။ အဲ သူ့နာမည်ကိုခေါ်လိုက်ရင်တော့ ငြိမ်သွားတယ် မဟောင်တော့ဘူး။ ဖေဖေနဲ့မေမေက မိတ်ဆွေအရမ်းများတာဆိုတော့ တစ်နေ့တစ်နေ့ ဧည့်သည်တွေ အရမ်းလာကြတယ်။ ရုံးပိတ်ရက်တွေဆို ပိုဆိုးတယ်။ အဲ့ဒီအချိန်ဆို ဂျော့ ကအဓိက ပြသနာဖြစ်လာရော ..။ သူကဘယ်သူ့ကို မဆိုအရမ်းဟောင်တာကိုး။ ဟောင်ပြီးဆိုရင် နာမည်လှမ်းခေါ်လိုက်ရင် ငြိမ်သွားပြန်တယ်။ ဧည့်သည်တစ်ယောက်လာပြီဆိုရင် `ခွေးက မကိုက်ဘူး ဟောင်ပဲဟောင်တာ ဂျော့ လို့နာမည်ခေါ်လိုက်´ အဲ့လိုပြောပြောနေရတော့ ကျွန်တော့် တစ်ခုစဉ်းစားမိတယ်။ နေ့တိုင်း ဒီလိုပြောနေရရင် မလွယ်ဘူးလေ...။ အဲ့ဒါနဲ့ ခြံရှေ့မှာ စာတန်းတစ်ခု ကျွန်တော်ထွက်ကပ်ထားလိုက်တယ်။
`သတိ- ခွေးမကိုက်တတ်ပါ။
ဟောင်ရုံဟောင်ခြင်းသာဖြစ်သည်။
ဂျော့ ဟု သူ့နာမည်ခေါ်လိုက်ပါက မဟောင်ပဲ ငြိမ်သွားပါလိမ့်မည်။´
ကဲ ငြိမ်းချမ်းသွားရော...။ ဧည့်သည်တွေလည်း အဆင်ပြေသွားတယ်။ ကျွန်တော်တို့လည်း ခွေးထိန်းစရာမလိုတော့ဘူးပေါ့။
အဲတစ်ခုပဲ ပြောစရာကျန်ခဲ့တယ်။ အဲ့ဒီညက ကျွန်တော်တို့အိမ် သူခိုးဝင်ခိုးခံရတာပဲ .....:D
သူခိုးဆိုလို့ ပြောရဦးမယ်သိလား ... ။ ကျွန်တော် အခိုးခံလိုက်ရတဲ့အကြောင်း .. ။ အဲ့ဒီနေ့က ကျွန်တော်တို့ရပ်ကွက်ထဲမှာ အလှူရှိတယ်လေ။ ရပ်ကွက်တစ်ခုလုံး မီးခိုးတိတ်ပဲ ( ပြောရိုးရှိလို့သာ မီးခိုးတိတ်လို့ပြောတာသိလား၊တခြားနေ့တွေမှာလည်း ကျွန်တော်တို့ရပ်ကွက်မှာ မီးခိုးမအူဘူး။ ဘယ်သူမှထင်းမီးမသုံးလို့လေ ။ လျှပ်စစ်မီးဖိုပဲသုံးတယ်။ အင်းပေါ့လေ အဲ့ဒီအချိန်တုံးက မီးလည်းမှန်မှန်လာတာပါမှာပေါ့ )။ ကျွန်တော်တို့မိသားစုလည်း အလှူအိမ်သွားစားကြမယ်ပေါ့...။ မေမေက ကျွန်တော့်အတွက် ဖိနပ်အသစ်လေး ၀ယ်ပေးထားတာရှိတယ်။ ပွဲတွေဘာတွေမှဝတ်ဖို့လေ.. အဲ့ဒီနေ့က အဲ့ဒီဖိနပ်လေး ကိုထုတ်ဝတ်တယ်။ ဖိနပ်အသစ်နဲ့မို့လို့လား မသိဘူး ။ ကျွန်တော်မြောက်ကြွမြောက်ကြွဖြစ်နေသလိုပဲ ဟဲဟဲ ..။ အလှူအိမ်ရောက်တော့ ကျွန်တော့်သူငယ်ချင်း ဗုတို ကိုတွေ့တယ်။ သူ့နာမည်အရင်းက တေဇာကျော် ပါ။ အရပ်အရမ်းရှည်လို့ သူ့အိမ်က ဗုတိုလို့ခေါ်တယ်ပြောတာပဲ ..။ ဘာတွေမှန်းလဲမသိဘူး။ ထားပါတော့ ။ ဗုတို တို့မိသားစုက အရင်ရောက်နေတာပေါ့။ ကျွန်တော်တို့ကလည်း သူတို့ဝိုင်းကို ၀င်ထိုင်ကြတယ်။ ဗုတိုဘေးမှာ ကျွန်တော်ထိုင်တယ်။ ဟင်းတွေက စားကောင်းလိုက်တာဗျာ။ ကြက်သားဟင်းကို ပင်တိုင်ဟင်းအဖြစ်ထားပြီး ကျန်အရံဟင်း အများကြီးနဲ့ကျွေးတယ်။ ကျွန်တော့်သူငယ်ချင်း ဗုတိုက ကြက်သားဟင်းခွက်ကို လှမ်းလို့မမီဘူး။ အဲ့ဒါနဲ့ မီတဲ့ကျွန်တော်က သီချင်းလေးဆိုရင်းနဲ့ ကြက်တောင်ပံလေးကို ခပ်ထည့်ပေးလိုက်တယ်။
`....တောင်ပံ ပါရင်မင်းဆီကို.... ´ ဆိုပြီးတော့လေ ..။ ကျွန်တော်က တော့အသားများတဲ့ အတုံးကိုရွေးစားတာပေါ့ ဟီးဟီး..။ ကြက်သားဟင်း ကအရိုးတွေပါတယ်ဗျ။ အဲ့ဒါစားတဲ့သူတွေက အရိုးတွေကို ကိုယ့်ပန်းကန်ဘေးမှာ ပုံကြတာပေါ့။ ကျွန်တော်လည်း ကိုယ့်ပန်းကန်ဘေး အရိုးကိုပုံတာပေါ့။ ဒါပေမယ့် ဗုတိုက ကျွန်တော့်ကို မကျေနပ်လို့နဲ့ထင်တယ်။ သူ့အရိုးတွေကို ကျွန်တော့်ပန်းကန်ဘေးမှာ လာပုံတယ်။ ကျွန်တော်ကမသိဘူးလေ။ အားလုံးစားလို့သောက်လို့လည်း ပြီးသွားတော့ ဗုတိုက ပြောပါလေရော
`ငကောင်း ကသူများတွေထက် ပိုအားပေးတယ်ဟေ့ ´
ကျွန်တော်လည်းကိုယ့်ပန်းကန်ဘေးကို ကြည့်လိုက်မှ အရိုးပုံကြီးက သူများဟာတွေထက် နှစ်ဆလောက် ဖြစ်နေတာကိုတွေ့တော့ ဗုတိုအကြံကို ရိပ်မိတော့တယ်။ ကျွန်တော့်ကို သက်သက်မဲ့ အရှက်ခွဲတာပဲ အဲ့ဒါနဲ့ ကျွန်တော်လည်း ပြန်ပြောလိုက်တာပေါ့
`မင်းကကျတော့ ပိုဆိုးတာပေါ့ကွာ။ ဘယ်ကတည်းက ငတ်နေလို့လည်း မသိဘူး။ အသားရော အရိုးပါ အကုန်စားပစ်လိုက်တာ၊ ကြည့်စမ်းပါဦး။ ဘာအရိုးမှကို မကျန်တော့ဘူး။ ´ နည်းနည်း ၀ရုန်းသုန်းကားဖြစ်သွားတော့မလို့ ...။
စားပြီးသောက်ပြီးလိုပြန်ကြတော့မှ ဒုက္ခက စတော့တာပဲ ...။ ကျွန်တော့်ဖိနပ်အသစ်လေး ပျောက်သွားပြီဗျ။ ကလေးဖိနပ်တောင် မချန်ဘူးဗျာ ...။ လုပ်ရက်လိုက်တာ။ အဲ့ဒီနေ့က ဖေဖေက ကျွန်တော့်ကို ကုန်းပိုးခေါ်သွားလို့ ကျွန်တော်နည်းနည်း သက်သာသွားတယ်။ ဒါပေမယ့် ကျွန်တော် မကျေနပ်ဘူး။ နောက်တစ်ခါ အလှူသွားရင် ဖိနပ်မပျောက်အောင် ဘယ်လိုလုပ်ရမလဲဆိုပြီး စဉ်းစားလိုက်တော၊့ ဟော သိပြီ။ ကျွန်တော်ကြံရင် ဘယ်ကြောင်မှ ညောင် လိုတောင်မအော်ဘူးရယ်
( နောက်တစ်ခါဆို သေသေချာချာ နားထောင်ကြည့်လိုက် ကြောင်တွေက ညောင် လို့ဘယ်တုံးကမှ မအော်ဘူး။ သူတို့ အော်ရင် မြောင် မြောင် မြောင် နဲ့ )..။
နောက်တစ်လလောက်ကြာတော့ ကျွန်တော်တို့ ရပ်ကွက်မှာ အလှူထပ်လုပ်ပါတယ်။ ကျွန်တော်ကတော့ ဒီတစ်ခါဖိနပ်မပျောက်တော့ဘူး ကွဆိုပြီး ကျိတ်ပျော်နေတာပေါ့။ ထုံးစံအတိုင်း စားပြီးသောက်ပြီး ကြလို့ ပြန်ထွက်ကြတော့ ဖေဖေက ကျွန်တော့်ဖိနပ်ထားတဲ့နေရာကို သွားကြည့်တယ်။ ဖိနပ်ပျောက်သွားပြီလားလို့ပေါ့။
`သားရေ ဒီတစ်ခါလည်း မင်းဖိနပ်ပျောက်ပြန်ပြီဟေ့ .. ။ ဒီတစ်ခါတော့ တစ်ဖက်တည်းပျောက်တာကွ ..´
ဖေဖေက ပြောလိုက်တော့ မေမေကလည်း လန့်သွားတာပေါ့ ဖိနပ်ပျောက်ပြန်ပြီဆိုပြီးတော့ပေါ့။ ကျွန်တော်ကတော့ မလန့်ပါဘူး။ ဖိနပ်လေးကို သွားစီးလိုက်တယ်။ ပြီးတော့ နောက်တစ်ဖက်ကို သွားစီးလိုက်တယ်။
` ငါ့သား လို့မပြောရဘူး တော်လိုက်တာကွာ´ တဲ့
ဟုတ်တယ်လေ။ ကျွန်တော်က အလှူအိမ်မှာ ဖိနပ်ချွတ်တော့ အပေါက်ဝရဲ့ ညာဘက်မှာ ညာဘက်ဖိနပ်ကို ချွတ်ပြီး ဘယ်ဘက်မှာ ဘယ်ဘက်ဖိနပ်ကို ချွတ်ထားထာလေ။ တစ်ဖက်စီခွဲချွတ်ထားတော့ ဘယ်မှာပျောက်ဦးမှာတုံးဗျ ....:D
ပြောရဦးမယ်သိလား .. ငယ်ငယ်တုံးကလေ ကျွန်တော်တို့မိသားစု မဟာမြတ်မုနိဘုရားကြီးကိုတစ်လတစ်ခါသွားပြီ ရွှေသင်္ကန်းကပ်နေကြ။ သွားပြီဆိုရင် လိုင်းကားနဲ့သွားရတာပေါ့။ လိုင်းကားဆိုတော့ သိတဲ့အတိုင်းပဲ အရမ်းကျပ်တာပေါ့ ။ တစ်နေရာရဖို့ကိုမလွယ်ဘူး။ အဲ့ဒီလိုလိုင်းကားတွေနေရာအရမ်းကျပ်တဲ့ အကြောင်းကို ကျွန်တော်တို့နဲ့ အတူတူကားစောင့်နေတဲ့ ဦးလေးကြီးနှစ်ယောက် ပြောဆိုနေကြတာပေါ့။ စုံစိနေတာပဲ။ ကျွန်တော်လည်း နားငြီးလာတာနဲ့ ၀င်ပြောလိုက်တယ် ...
`ဦးလေး လိုင်းကားပေါ်မှာ လွယ်လွယ်နဲ့ ထိုင်စရာနေရာရတဲ့နည်းရှိတယ်။ ယူမလား .... ´
`ဟ ယူမှာပေါ့ ကောင်လေးရ ပြောစမ်းပါဦး ..´ အဲ့ဒါနဲ့ ကျွန်တော်လည်း တစ်ခွန်းပဲ ပြောလိုက်တယ်။
`ကားမောင်းသမားဖြစ်အောင်လုပ်ပေါ့ ´ လို့
မေမေနဲ့ ဖေဖေပါလို့ ကျွန်တော်သက်သာသွားတယ်။ မဟုတ်ရင် လူကြီးကို နောက်ရပါ့မလားဆိုပြီး ဆော်ကြဦးမယ်နဲ့ တူတယ်။
အဲ့လိုနဲ့လေ တဖြည်းဖြည်းနဲ့ အသက်ကလည်းနည်းနည်းကြီးလာတော့ အသိပညာတွေလည်း အများကြီးတိုးလာတာပေါ့။
ဘယ်လိုတွေတိုးလာလဲဆိုတော့ မမွေးသေးခင်ရော သေသွားရင်ရော စားလို့ရတဲ့သတ္တ၀ါဆိုလို့ ကြက်တွေပဲ ရှိတယ်ဆိုတာသိလာတယ်။ ငယ်ငယ်က အင်္ကျီ ၇ ထည် ပုဆိုး ၇ထည်ရှိရင် ၇ ရက်ပဲဝတ်လို့ရမယ်ထင်ခဲ့ပေမယ့် အခုကျတော့ သိသွားပြီ အင်္ကျီ ၇ထည် ပုဆိုး ၇ထည်ရှိရင် ၉၈ ရက်ဝတ်လို့ရတယ်ဆိုတာကိုလေ ..။ အဲ့လို အဲ့လိုတွေပေါ့ ....။
တစ်ခါတစ်ခါကျတော့လည်း ကလေးဘ၀တုံးက သိခဲ့ရတာတွေက အသက်ကြီးတဲ့အထိ သုံးလို့ရတယ်ဗျ။ ဥပမာ ကြောင်တစ်ကောင်ကိုလိုချင်ရင် မြင်းတစ်ကောင်ကနေစ ပူဆာရမယ်တို့၊ ကိုယ်လုပ်တဲ့အတိုင်း စည်းကမ်းသတ်မှတ် လိုက်တာအကောင်းဆုံးတို့၊ တစ်ခါတစ်လေမှာ စာမေးပွဲတွေက စာကျက်လို့မပြီးခင် ဖြေရတတ်တယ်ဆိုတာတို့ပေါ့ ....။
အော် ဒါနဲ့ ပြောရဦးမယ်သိလား ... ကျွန်တော့်ဘာသာကျွန်တော် စိတ်ရူးပေါက်ပြီး ရေးချင်တာတွေ ရေးထားတာကို ဆုံးအောင်ဖတ်ပေးလို့ ကျေးဇူးတင်ပါတယ်လို့.....။
ပျင်းတယ်ပြန်တော့မယ် နောက်မှ ထပ်ပြောပြမယ်နော် ငယ်ဘ၀အမှတ်တရလေးတွေကို ...။
ṂǥЌAṳถḡ